شهادة الجامعة البريطانية في مصر

مبدئيا الجامعه البريطانيه فيها 9 كليات

لو انت طالب امريكان و جايب سكور فوق ٩٦٠ او IG

مبيتعملكش امتحان انجليزى مع ال admission

بس السكور بتاعك فى المدرسه بيحدد انت هتبقي فى كلاس لفل ايه فى الانجليزى فى الجامعه.

لو انت طالب ثانويه عامه او امريكان اقل من ٩٦٠ , بتمتحن يا اما IELTS

يا اما APTIS

الابتس, جوه الجامعه البريطانيه.

كل الكليات بتدى شهادتين. شهاده المجلس الاعلى للجامعات المصريه و شهاده من London South Bank University

ما عدا كليه التمريض بتدى من Queen Margret University

و أسنان و صيدله شهاده مصريه فقط, وده الحال فى تقريبا كل الجامعات الخاصه.. الجامعه البريطانيه بتديك شهاده مصريه معتمده من وزاره التعليم العالي، و بمجرد تخرجه بيسجل في النقابه.

كل المصاريف الى هكتبها دى مصاريف السنه الى فاتت.. فى الغالب السنه دى هتزيد

1) هندسه لو ابنك او بنتك جايبين 85% فيما فوق, يعتبروا نفسهم دخلوا.. ممكن تنزل ل 80% حسب الاماكن المتاحه..مصاريفها 55 الف مصري و 5000 مصاريف اداريه و 500 استرليني

2) بيزنس.. 70% , و مصاريفها 45 الف و 5000 مصاريف اداريه و 500 جنيه استرلينى

3) أسنان.. و دى عليها بالضرب فى البريطانيه.. بتاخد من 97% و ممكن ساعات تنزل ل 96 او 95% حسب متوسط سكور الطلاب ايه .. بس عاده 97%

مصاريفها 58 الف و 6500 مصاريف اداريه .. و مفيش حاجه بالاسترليني عشان ملهاش شهاده بريطانيه

4) صيدليه بتاخد من 90% و مصاريفها 55 الف و 6500 مصاريف اداريه و مفيش استرلينى

5) تمريض بتاخد علمى علوم فقط من 60% 

و لازم يعملو تحديد مستوى و انترفيو شخصي مع العميده نفسها

مصاريفها 15 الف مصري و 100 جنيه استرليني

تمريض افتتحت فى الجامعه البريطانيه لرغبتها بأن تنهض بالمهنه و متفضلش دايما مقصوره على فئه معينه , و يبقو الممرضين فى المستشفيات الاستثماريه اتعلموا تعليم محترم جدا زى الى فى بريطانيا بالضبط.. عشان كده تمريض الكليه الطبيه الى اصروا انها تتعادل و تعتمد من بريطانيا و انها تخرج طلبه على نفس مستوى التمريض البريطانى.

6) كومبيوتر ساينس, من 75% و مصاريفها 30 الف و 5000 مصاريف اداريه و 500 استرلينى

7) كليه الاداب و العلوم الانسانيه

فيها قسم اللغه الانجليزيه.. و بالمناسبه معظم الدكاتره الى درسولى فى اداب انجليزى عين شمس, بيدرسوا هناك دلوقتى .. بشوفهم هناك ببقي مبسوطه اوى.. بتقبل من 65% 

و قسم علم النفس بيقبل من 55% و مصاريفها 45 الف و 5000 مصاريف اداريه و 500 استرليني

8)كليه الحقوق بتقبل من 55% و مصاريفها 45 الف و 5000 مصاريف اداريه و 500 استرليني

9) كليه الاعلام من 70% و مصاريفها 45 الف و 5000 مصاريف اداريه و 500 استرليني

معنى ان ابنك او بنتك معاه شهادتين يعنى فرصه فى الهجره و السفر اسرع لأنه شهادته البرطانيه اسهل كتير يعادل بيها شهادات كندا او استراليا.

انا مش بعمل اعلان للجامعه انا شغلى بعيد عن الطلبه.. بس انا بشوف الطلبه هناك مبسوطه جدا.. بيدخلو حاجه , بيخرجوا حاجه تانيه خالص...يعنى من فتره كان عندهم United Nations Model

بيعملوا محاكاه لليونايتد ناشينز و بيديرها الدكاتره نفسهم.. دى حاجه بتخرج كوادر مختلفه تماما للمجتمع و

بيتعلموا مهارات كتير اوى و بيتخرجوا فعلا يفرحوا القلب.

طبعا الطالب لو متفوق, ليه منحه و لو IG بيبقي لسه خصم زياده

و لو متفوق رياضيا برضه بياخد خصم.. لان الجامعات بتحاول تجذب الأفضل. لان الخريج ده فى وشها فى الاخر و شايل اسمها.

المنح للسنه الأول فقط, الطالب بئه و شطارته هيكمل متفوق ولا لا.. و ده الحال فى كل الجامعات.

و بالنسبه للمغتربين.. الجامعه عندها dorms

فى الشروق و مدينتى .. عمارات كامله مأجراها الجامعه.. مؤمنه تماما و الى ماسكها حد كان كبير فى الجيش المصري. متقلقوش عالولاد :D

الشقق مجهزه تماما بتلاجه و بوتجاز و غيره و بتبقي فى حدود 16 او 17الف فى السنه , بدون أكل طبعا.

الadmission

فتح من يناير.. الى عايز يقدم, ينجز عشان الى بيتسنى النتيجه مبيلقيش مكان و يقعد يدور فى كذا جامعه و بيفضل لاخر اسبوع قبل الدراسه مش عارف ابنه ولا بنته هيتقبلو فين عشان محطوطين عالwaiting list