امتحان القبول بقسم اكتواري جامعة القاهرة

قسم اكتوارى لطلبه كليه التجاره اللي حابين يقدموا فيه

عشان تخش قسم اكتوارى دا لازم يتوافر فيك شرطين

1- انك تكون جايب في سنة اولى تقدير لا يقل عن جيد

2- انك تكون جايب في الثانوية العامة فى الانجليش والرياضة ما لايقل عن 80% من مجموع كل مادة على حدة

يعنى في الرياضة ماتقلش عن 40 من 50

والانجليش ماتقلش عن 40 من 50

اذا توافر فيك الشرطين دول يبقى تمام كمل معايا الجزئية دى

مش متوافر فيك بعد اذنك اجرى بالماوس وتخطاها

عشان مش هاتفيدك فى حاجة

دلوقتى بعد ما خلصت سنة اولى الحمدلله بنجاح وبتقدير جيد

بعد ما النتيجة تظهر بحوالى أسبوع كدا او أسبوعين

هاتروح لشئون الطلبة بتاعة المجموعة بتاعتك

وتقولهم انا عايز حاجتين :

1- بيان نجاح (اثبات قيد) ومكتوب فيه تقدير سنة اولى

(وعشان تعمله بتدفع 10 جنيه فى الخزنة)

2- صورة من استمارة الثانوية العامة اللى انتا قدمت بيها فى الكلية

(وممكن يدفعك فلوس على الصورة دي عادى يعنى)

وفايدة الورقتين دول ايه بقى ؟

1- ان بيان النجاح دا اثبات انك جيبت جيد في سنة اولى

2- استمارة الثانوية العامة دى بتتجاب عشان يشوفوا درجاتك فى الانجليش والرياضة كانوا كام

بعد مابتطلع الورقتين دول بتقوم واخدهم وطيران على شئون تجارة انجليش

(دا لو انت كنت تجارة عربى اما لو كنت تجارة انجليش خلاص كله بيخلص من شباك واحد)

تديهم الورقتين هايشوفوا درجاتك وتقديرك يسمح ولا لأ

وبعد مابيتأكدوا بتقوم مدياك أذن دفع بـ 200 جنيه

تروح تدفعهم فى خزنة الكلية وترجع تانى هاتقوم مدياك استمارة التقديم

هاتملا بياناتك فيها .. وهايتتحددلك معاد الامتحان

اذن من الآخر الاستمارة دى ماهى الا حجز للامتحان مش اكتر

ناس هاتسألنى بقى تقولى .. الامتحان دا فى ايه ؟؟؟

الامتحان دا فيه انجليش و ماث (رياضة يعنى بس انجليش)

طب ودا هانخشه ازاى من غير مانذاكر ؟

والله عايز تذاكر ممكن تذاكر مع نفسك

عايز تاخد فيه كورسات .. ممكن تاخد فيه كورسات

الجامعة مقدمالك كورس بتروح تقدم عليه فى مركز خدمة المجتمع

اسم الكورس : العلوم الاكتوارية

مدة الدراسة : اسبوعين (كل يوم 4 ساعات)

القيمة : 200 جنيه للماث – 200 جنيه للانجليش

يعنى التوتال كدا 400 جنيه

مكان الدراسة : على حسب ما الدكاترة يحددوا

مع اول كلاس بتحضره بيدوك ملزمتين

ملزمة فى الانجليش وملزمة فى الماث

ودى زى بمثابة مرجع ليك فى المذاكرة يعنى

بعد مابتخلص الكورس بـ 10 ايام بتخش الامتحان

الامتحان مدته ساعة بتحل فيها حوالى 4 ورقات

بعدها بفترة بتنزل النتيجة وتتعلق قدام باب تجارة انجليش

بأسماء الطلبة الناجحين فقط

يعنى الطلبة اللي ماوفقوش ودخلوا القسم مابيكونوش مكتوبين

فيه ناس بتدور في دماغهم الاسئلة دي :

1- القسم دا انا سمعت عنه كتير اوى .. هوا مهم ؟؟

الحقيقة أهمية القسم دا بترجع لانه تخصص زي مابنقول كدا نادر

او بمعنى اصح مميز .. ودا عشان كذا سبب :

أ- عدد الطلبة المقبولين فيه واللي بيدرسوا بيبقوا قليلين

ب- الدراسة فيه بالانجليش

جـ- مافيش فى مصر كلها غير جامعتين اللى بيدرسوا التخصص دا

جامعة القاهرة – الجامعة الامريكية

2- طب هوا انا لو دخلت القسم دا هاتخرج اشتغل ايه ؟؟

المفروض انك بتبقى خبير ائتمانى .. والخبير الائتمانى دا بيعمل حاجتين فى مجالين

- مجال البنوك -

المفروض لما شركة بتيجى تطلب قرض من اى بنك

الطبيعى ان البنك بيعمل دراسات ائتمانية عن الشركة دى

ويشوف هل هى هاتقدر تدفع اصل وفوايد القرض ولا لاء

وهيا دى بقى وظيفة خبير الائتمان .. انه بيعمل دراسة حوالين الشركة ويشوف هاتقدر تسدد ولا لاء

- مجال شركات التأمين -

اى بوليصة تأمين بيبقالها قواعد وشروط

وظيفة خبير الائتمان انه هوا اللى يحط الشروط دى

3- بالنسبة للناس المقبولة .. كام واحد بيتقبلوا ؟؟

من كام سنة كدا كانوا بياخدوا اعداد قليلة جدا جدا

يكفى انى افتكر دفعة 2008/2009 تقريبا كانوا واخدين 17 طالب !!

بس على كل حال دا النظام القديم .. النظام الجديد بقى يقبلوا 35 طالب

4- طب والنجاح في الامتحان دا من كام ؟؟

من 75%

5- وبالنسبة للمصاريف ؟؟

نفس مصاريف تجارة انجليش بالظبط (4500)

6- والكارنيه ؟ هل بيتم تمييزنا ولا زينا زى أى حد ؟؟

بيتكتب على الكارنيه فوق تجارة انجليزى – قسم علوم اكتوارية

يعنى معنى كدا ان انا هابقى متسجل في تجارة انجليش ولو فيه ورق عايز اخلصه من شئون الطلبة يبقى اروح شئون طلبة تجارة انجليش ؟؟

بالظبط كدا .. يعجبنى ذكائك

حتى لو انا كنت تجارة عربى في سنة اولي ؟؟

ايــوا .. بمجرد قبولك في قسم اكتواري كدا انت بقيت تجارة انجليش خلاص

7- وياترى شكلها ايه الاستمارة اللى بنقدم بيها دى ؟

8- انا كنت أدبى في ثانوي .. هل ينفع اخش ؟

اول ما القسم اتعمل كانو بياخدو خريجي الثانوية العامة من شعبة علمى رياضة فقط لا غير

بس بعد كدا فتحوها لكل الناس وبقى اي حد بيقدم بس لازم يكون متوافر فيه الشروط اللى قولنا عليها في الاول خالص

نصيحة أخيرة بخصوص قسم اكتواري

القسم دا عايز ناس دماغها نضيفة في الرياضة

بمعنى اصح تكون الرياضة دي لعبتك

اما لو كنت بتتخنق منها اصلا بس نفسك تروح تجارة انجليش وخلاص لا يبقى بلاش تقدم لانك مش هاتنجح في امتحان القبول اصلا وحرام عليك تدفع الـ 200 جنيه بتوع التقديم

وأخيراً للناس اللى ماحالفهاش الحظ في دخول تجارة انجليش في الثانوية العامة

احب اقولكو لســه فيه امل .. بس اتعبو شوية

بص دي كل معلومه ع قسم اكتواري