ما هي ورقة النت للسفر للسعودية

إجراءات الكشف الطبى للسفر للسعودية , انا طبعا كنت قد قبلت في مقابلات صيدليات النهدي بمكتب دار الخبرة

وخصلت كل الاوراق المطلوبة مني وقدمتها للمكتب علشان يخلصلي اجراءات السفر وكان من ضمن هذه الاجراءات ان اقوم ايضا بعمل إجراءات الكشف الطبى للسفر للسعودية.

المكتب قام بالاتصال بي علشان الكشف, ورحت للمكتب ادوني ( جواز السفر وصورة شخصية وورقة يطلق عليها ورقة النت لاستخدامها في اجراء الكشف الطبي ) وكمان ادوني ورقة فيها عناوين الاماكن اللي هروحلها لاجراء الكشف

إجراءات الكشف الطبى للسفر للسعودية.

اولا : بتتوجه الي معامل وزارة الصحة ودي مشوارها سهل وبسيط باذن الله هتروح عند ميدان التحرير وبعدين هناك تسال عن مجلس الشعب ,وبعد لما توصل عند مجلس الشعب اسال اي حد عن مكان معامل وزارة الصحة لاجراء كشف السفر الف مين هيدلك

ولكن حذاري ثم حذاري من الناس حوالين المعامل بتاعت وزارة الصحة . لان الف مين هيبقي عاوز يقلبك اوعي تدفع اي مليم لاي حد خارج معامل وزارة الصحة ولا حد يقولك هخلصك بسرعة ولا حد يقولك تعالي صور ورقة النت او حد يقولك تعالي نطلعلك علي الصورة الشخصية كل ده نصب وهجص مش هتحتاج اي حاجة جوه المعامل لا صور ولا وتصوير ورق ولا غيرو

هتدخل جوه معامل الوزارة هتلاقي في ناس كتير هتقف في دورك عادي الاعداد كبيرة بس بيمشو بسرعة لا تقلق , وبعدين لما يجي دورك هتطلع فوق في الطابور بتاعك وبعدين هتدفع مبلغ 250 جنيه وهتديله الباسبور ياخد منك شوية بيانات وبعدين يديهوبك تاني وبعدها هتدخل علي اوضة علشان يسحبو منك عينة دم وبعد كده شكراا, كده خلصت وهيقولوك اطلع علي مكان اسمه جامكا.

المكان ده يا سيدي هيبقي حوالي 15 دقيقة مشي من معامل وزارة الصحة او ممكن تاخد تاكسي هيوصلك في 5 دقائق والافضل خدها مش علشان كده كده بيبقي الطريق زحمة .

وخد بالك انتا وهو حذاري ثم حذاري من الناس برضو عند جامكا هيقولك هنجزلك الحوار وهدخلك بدري فكك منو انتا هيكون قدامك 100 واحد او اكثر في الترتيب بس عادي بيخلصو في اقل من ساعة زمن ان شاء الله.

كل اللي انتا بتدفعة في جامكا حوالي 25 جنيه بس برة لتخليص بعض الاوراق ولما تدخل بتستني دورك عادي وبعدين بتدخل علي ناس بتاخد منك الباسبور علشان تملا شوي بيانات وبيصوروك وبعدين بيطلعلوك ورقة بتاخدها علشان تكشف بيها في المستشفي اللي متحددة في الورقة ( يعني اهمية جامكا بتوزعك عشوائي علي مستشفي او معمل كبير لاجراء باقي التحاليل الطبية تمام كده )

انا جالي الاختيار العشوائي بتاعي معامل الفا سكان مصر الجديدة , ركبت ورحت عند الفا سكان مصر الجديدة ودخلت اديتهم برضو جواز السفر ملو شوية بيانات عندهم وخدو مني حوالي 450 جنيه وبعدين صوروني وخدو بصمتي وبعدين دخلت للكشف الطبي بتدخل عند دكتور عيون وباطنة وجراحة وبعدين بتعمل اشعة واخيرا بتروح ياخدو عينة دم منك وعينة بول وبعدين بيقولوك مع السلامة وبتاخد جواز سفرك وتتكل علي الله والنتيجة هما بيبعتوها علي القنصلية السعودية والمكتب اللي انتا مسافر معاه هو بيخلصباقي الورق وانتا كده خلصت اللي عليك في الكشف الطبي.