خطوات الكشف الطبى للسفر للسعودية 2020
خطوات السفر للسعوديه و دول الخليج
اولاََ
فى البدايه و قبل كل شىء احب ان انوه الى ان السفر الى الخارج ليس هوا بالجوهره التى يتخيل لدى البعض الفكره عنها انما هيا طريقه اخرى للعيش تختلف تمام الاختلاف عن الحياه بداخل بلدنا الحبيب مصرالحياه كفاح و تجربه كثير منها يفشل و بعضها القليل ينجح
ولكن تذكر لولا فشل اديسون فى المصباح لما كنا نرى النور ابدا
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انا مهندس ميكانيكا و ححاول اطرح التجربه بشكل اعم و اشمل من الاطار الهندسى يعنى عشان تناسب كل الفئات اللى ممكن تتفرج على الصفحه دى
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
قبل ما تفكر فى السفر حضرتك محتاج شويه حجات تبدا تجهز فيها :-
موقف حضرتك ايه من التجنيد ؟؟
لو انت واخد تاجيل يبقى الخطوات دى حتنفعك:-
- الاول حتتاكد ان بطاقتك بتاعت التجنيد فيها لايقل عن سنه و انت تتطلب للجيش مره تانيه و خلى بالك كتير من العقود بتكون لسنتين يعنى محتاج ان حضرتك يبقى عندك رصيد فى شهاده التاجيل لايقل عن سنتين وخلى بالك تقدر تطلع كذا شهاده بدل فاقد من التجنيد بس كل مره شهاده واحده بس
بدل فاقد محتاج صوره بطاقه + صوره من التاجيل + 255 جنيه مصاريف وممكن اكتر او اقل حسب الظروف خلى بالك الاعفا الطبى بيحتاج صور شخصيه خلفيه بيضا بالاضافه للطلبات دى
- خلى بالك كمان شهاده التاجيل بيكون عليها ختم بالازرق مكتوب عليه غير مصرح ليه بالسفر "ده كده مش حتسافر غير لما تطلع اذن سفر "
- بالنسبه لاذن السفر حكتب خطواته بالتفصيل بس لما يجى وقته
- بالنسبه للناس اللى واخدين اعفا نهائى مش محتاجين انهم يطلعوا اذن سفر من التجنيد قبل ما يسافر
- اللى واخدين اعفا طبى برده مش محتاج ياخد اذن سفر بس لازم يكون مكتوب اعفا نهائى لعدم لياقته الطبيه
- كل الاعفا مبيكونش عندهم ختم ازرق ناحيه اليمين من فوق على الشهاده
انا حنزل كل عنواين مكاتب التجنيد عشان اللى عايز يستفسر اكتر عن حاجه معينه يقدر يتصل و يتابع معاهم
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
مكاتب التجنيد وارقامهم على مستوى الجمهوريه:-
اضغط هنا
ده اللينك بتاع التجنيد و التعبئه على مستوى الجمهوريه
ثانياََ
بعد ما خلصنا من موال التجنيد و قصته و حكايه اذن السفر
دلوقتى محتاجين نتكلم على البطاقه الشخصيه
_________________________________________________
كلنا اثناء الدراسه بيكون مكتوب فى ضهر البطاقه طالب و بغض النظر طالب ايه او طالب فى كليه كذا
السؤال هنا ليه اتكلمت على الموقف من التجنيد ؟؟؟؟
لان ده بناء عليه فى خانه فى البطاقه مكتوب فيها الموقف من التجنيد
_ لازم تمشى الخطوات بالترتيب و بلاش تفوت خطوه قبل التانيه حتكلفك الخطوه من تانى يعنى ممكن تعمل نفس الخطوه كذا مره
_ احنا بنعمل كل الخطوات دى عشان الوظيفه اللى راح تتكتب فى الباسبور هيا نفسها اللى مكتوبه على البطاقه
_ كمان شهاده التاجيل او الاعفا بتاعت حضرتك حتبقى مكتوبه فى الباسبور و بناء عليها حيطلب منك موظف المطار سواء فى رتبه عسكريه او مدنيه ان حضرتك تبين ليه الموقف من التجنيد و اذن السفر فى حاله المؤجل تجنيده او المعافى موقتا
- بالنسبه للى واخدين اعفا مش حتعدى بكل القصه دى طول ما حضرتك مكتوب عندك فى الباسبور انك غير مطلوب للتجنيد
______________________________________________________
خطوات الباسبور سواء لاول مره او تجديد او تغيير مسمى وظيفه:_
-محتاج صوره من البطاقه وش و ضهر على الاقل 3 نسخ
-كذا صوره شخصيه خلفيه بيضا زى بتاعت اللوتريه و عشان خاطرى هاتها محترمه و تبقى لابس فيها بدله كده و شكلك ابن ناس عشان ده باسبور يعنى حاجه مهمه طبعا نفس الكلام للبنات
خلى بالك احتفظ بالصوره دى البيضا و خلى معاك دايما صوره احتياطى حتحتاجها للخطوات اللى جايه مهمه جدااااا
- اصل كل الشهادات التاليه : ( شهاده التخرج - شهاده الميلاد - شهاده التجنيد سواء اعفا او تاجيل او ...... اى حاجه تانيه - اى شهاده تانى معاك )
- مصاريف استخراج الباسبور مش حتعدى 500 جنيه
-الباسبور بيطلع فى اربع ايام
- خلى بالك المهنه اللى متسجله على الباسبور هيا اللى عليها حيطلع العقد و يتوثق مهمه جدااااااااااا
ثالثاََ دور توثيق شهادات التخرج من الجامعه
______________________________________________________الشهاده اللى مع حضرتك عليها ختم واحد بس و هوا ختم الجمهوريه اللى بتقول فيه ان معاليك اتخرجت من جامعه كذا و بيديلك توثيق للشهاده اللى معاك و بيبقى مكتوب عليها من فوق شهاده مؤقته
-امال ايه توثيق الخارجيه ؟؟؟؟؟؟؟
توثيق الخارجيه ده حاجه تانيه خالص و دى لازم بتوثق شهادتك عشان لما بتخلص ورقك بيطلب منك شهاده تخرج بالعربى للى حيسافر السعوديه و الشهاده دى بتوثقها من الخارجيه المصريه
_____________________________________________________
بتروح حضرتك لمكتب فى الجامعه بتاعتك اسمه مكتب امانه الجامعه و فى الغالب بيكون فى المبنى الرئيسى للجامعه او اى مكان تانى فى الجامعه و اسال عن مكانه فى كليتك لما تروح الجامعه
خطوات التوثيق:-
- على افتراض انك مش معاك شهاده تخرج بتروح الكليه تطلع شهاده تخرج و دى بتبقى مصاريفها من 15 الى 50 جنيه على حسب كل جامعه
- بتطلع بالشهاده دى على مكتب امانه الجامه مكتب امين عام الجامعهو بتقوله انا عايز اوثق شهاده التخرج دى
كل شهاده بيكون عليها 10 جنيه رسوم بتسددها فى الخزنه
- بمجرد ما يحطلك عليها ختم الامانه بتاع الجامعه كده انت خلصت نص المشوار
- بتروح على مكتب وزاره الخارجيه و انا حنزل لحضراتكم اماكن المكاتب على مستوى الجمهوريه
-بتروح و بتديله الشهايد اللى عايز توثقها و بياخد عليها 11 جنيه مصاريف لكل شهاده منهم
- خلى بالك من الاختام و انا حعدهم تانى معاك
- ختم بيضاوى كبير و جنبه ختم شعار ده بتاع امانه الجامعه
-ختم بيضاوى كبير و جنبه ختمين شعار ده للتوثيق من الخارجيه
بكده تكون حضرتك وثقت شهادتك من الخارجيه
_____________________________________________________
عناوين وزاره الخارجيه للتوثيق الشهادات :-
اسمه مكتب التصديقات - وزاره الخارجيه
اضغط هنا
رابعاََ دور اهم حاجه دلوقتى و هيا ازاى تدور على عقد
__________________________________________________فى الاول و قبل ما تتسرع ولا تتدبس فى اى حاجه حابب الفت نظرك لحجات كتير اهمها على الاطلاق ان الموال ده النصب فيه زى الرز
- النصب على المغفلين كتير وانا مش حابب ان يتنصب عليك
- انا لما قررت اكتب الكلام ده و اشيره معاكم ملقيتش حد يفيدنى ولانى تعبت كتير مش حابب انك تتعب زيى متنساش الخبره مش ببلاش
- حاجه تانى مهمه انت زى السلعه ليك سوق و عليك طلب
- ياما تراب متلمع بيساوى دهب و ياما دهب مركون ملهوش تمن
- ده انت يعنى المطلوب منك انك تلمع نفسك تخلى يبقالك سوق
__________________________________________________
- السى فى CV
- ده مش عايز اقولك حضرتك ان ده اهم منك شخصياََ لانه مش حيشوف سيادتك اصلا انت بالنسباله سلعه و بيقدرك بسنين تخرجك و سنين خبرتك
- معلش متزعلش من صراحتى اللى بكتب بيها انا اعرف اصحاب شركات توظيف و كنت بشوف معاهم ازاى بيشتغلوا الصنعه دى
حضرتك سلعه و بيدوروا ليك على مشترى بمعنى اشيك مستثمر
- السعوديه بالاخص لازم تكتب سى فى cvv عربى لانه ببساطه المكتب اللى بيختارك لو لقيك كاتبه انجليزى ممكن ميعرفش يقراه فيقوم رميه فى الزباله ممممممممممم كلام مش كويس
- يبقى ال cv ده لازم يكون محترم اديله اهتمام و شياكه و كل خطوه خطيتها اكتبها كله بيتقدر بفلوس
- جيه بقى دورك انك تدور على مكاتب توظيف عماله و ده بصراحه مشكله عويصه ليه ؟ لان فى شركات كتير تحت السلم عايزين فلوس و خلاص يقلبوك فى قرشين كده على الماشى و كل يم يوقولك بكره و حلنى على ما تفرج
- طب السؤال ازاى اعرف المكتب ده محترم ولا لا ؟
سؤال ذكى بس حقولك لازم تتدعى من ربنا انه يوفقك و انت بتبعت فى كل اللى تلاقى ليه موقع على النت و خليك ذكى انت و بتبعت اكتب عندك فى ورقه ولا فى نوته اسماء الشركات اللى بعتلها و نبذه عنها لان سبحان الله حتلاقى فى لحظه ممكن اكتر من كذا شركه تتصل و عايزين يعملوا معاك مقابله مش معنى المقابله انك سافرت لا ده هما بيسوقوا بضاعتهم اللى هوا حضرتك و الراجل السعودى بينقى من بينكم اللى يناسبه و على حسب كل شغلانه
- بعت حضرتك و سجلت الاسماء بتاعت المكاتب فى نوته او على ورقه جرنال المهم انك تعرف انت بعت لمين و اسمهم و الوظيفه اللى كانوا طالبينها جيه دلوقتى دور انك تدور او بمعنى اصح تغربل الشركات دى و تشوف تعليقات الناس عى الشركات دى و اللى بيشتم و اللى بيسب فى الشركه و اللى بيقول كويسه و اللى بيقول تمام ركز جداااااااا
- حكررهالك من تانى الخبره مش ببلاش
- خلاص كده انت عرفت الشركه اللى اتصلت بيك دنيتها ايه و البشريه كتبت عنها ايه؟
- شوف بقى قرارك حتروح المقابله معاهم ولا لا
- افتكر ان الحركه بركه و الشغل مش بيجى تحت البيت
خامساََ دور المقابله الشخصيه
______________________________________________________- الوووو شركه كذا كذا معاك احنا اخترناك و مش لاقين زيك و حابيين تيجى تشرفنا عشان الباشا السعودى جاى بكره ولا اى يوم تقولهولك انه موجود و حيعمل مقابلات
- وصلنا مع بعض للنقطه انك حتسافر ده بعد ما تعرف المقابلات على ايه سواء شركه ولا اى بتنجان المهم انك قررت تسافر القاهره عشان المقابله
- خلى بالك الشركات الكبيره المحترمه بيبان عليها من خلق البشر اللى شغاليين فيها و برده الوشوش بتدارى الحقيقه
- خليك لابس شيك و روح متقيف للمقابله
- مفروض حديك ابليكيشن و يقولك املاه و متبقاش فلاح و تقولوه هات قلم املا بيه لا من المرفوض انك راجل جاهز جايب حجاتك معاك
- يعنى ورقك كله و بتاع 3 نسخ من كل ورقه
- متنساش صور خلفيه بيضا نفس اللى فى الباسبور
- و بعد ما تملاه بتنظر دورك بس خلى بالك لو كل شويه عمال بيلطعك قوم و خلى عندك كرامه و نخوه اشطه كده يا بوب
____________________________________________________
وقت مقابله السعودى
- ركز اووووى فى كلامه و خليه هوا اللى يفتح الحوار
- خليه هوا يستدرج الكلام معاك و بلاش شغل الفهلوه
- خليك فاكر رزقك مش حياخده حد غيرك
- لما بيقتنع بيك و بمؤهلاتك و لغاتك لو كان حد متعلم
- حيبدا يتكلم معاك فى مرتبك
- المرتب ده حوار كل واحد يدخل على النت و يعرف مرتبه بيتراوح من كام لكام
- خلى بالك فى غير المرتب حجات تانى ( سكن و هل هيكون مفرد ولا عائلى - تذاكر سفر و نوع الدرجه اللى حتسافر عليها و عدد الافراد لو انت متزوج - المواصلات هل يوفرلك مواصلات ولا حديلك عربيه و ده بيتطلب منك رخصه سواقه خاصه او مهنيه - ...... الخ)
- ساعات العمل و مكانه و وقت الراحه و الاجازه الاسبوعيه و الاجازات الاعتياديه و المرضيه
- خلى بالك من حته مهمه اوووووووى لو لقدر الله حبيت تنزل مصر ايه الوضع ؟؟؟ يعنى لازم تسال على الشرط الجزائى
سادساََ انا حتكلم هنا عن الكشف الطبى
__________________________________________________الاول و قبل ما تبدا بالكشوفات لازم بتجيب من المكت اللى بيجهزلك الورق و هوا لا بيجهز ولا بينيل حاجه المهم بيدتفع 300 جنيه عشان يطلعلك ورقه اسمها كارت نت او ورقه نت حسب المكان و المسمى
دى متطلباتها صوره خلفيه بيضا و الباسبور بتاعك و والشهاده اللى متوثقه من الخارجيه اللى اتكلمت عنها قبل كده
_________________________________________________
بعد ما بتاخد ورقه النت دى و بتبقى من صورتين زى بعضهم
اول مشوار فى التحاليل حيكون فى
_________________________________________________
-معامل وزاره الصحه
مواعيد العمل : من السبت حتى الخميس من 9 صباحا حتى 3 عصراالتليفون : 16082
عنونها سهل خالص تركب مترو و تنزل سعد زغلول لان السادات قافل
و تسال على الجامعه الاميريكيه شارع الشيخ ريحان خلف الجامعه مباشره و لو حتركب مواصلات انزل فى ميدان التحرير الجامعه قدامك على طلول اول شارع شمال
مبنى وزاره الصحه معامل الوزاره - شارع الشيخ ريحان - خلف الجامعه الاميركيه
حتدخل و حيطلب منك ورقه النت + 120 جنيه + 3 صور خلفيه بيضا
حيسحب منك عينه دم لتحاليل الايدز و سى
حيديلك ورقه عليها موقع على النت بتبان عليه نتيجه الكشف بتاع المعمل و بيبان فى خلال 4 ايام
يا مسهل
_______________________________________________
العنوان الخاص بمركز جامكا وده المكان اللى السعوديه متعاقده معاه للكشوفات
العنون مركز جامكا - شارع عائشه التيموريه جاردن سيتى - خلف القنصليه السعوديهمواعيد العمل : من السبت حتى الخميس من 9 صباحا حتى 3 عصرا
التليفون : 02--27927928
اسال عليه بعد لما تخلص حوار المعمل بتاع وزاره الصحه - انا عن نفسى اتمشيتها لانها مش بعيده حركه 20 دقيقه مشى
هناك الراجل بيدليك رقم و يقولك استنى دورك
بمجرد ما يجى دورك بيطلعك الدور التانى عند شويه مكاتب و عليهم اجهزه و وظيفه جامكا انها بتبعت لشويه مستشفيات تانى
بمعنى اوضح ان جامكا ما والا مجرد تحويله للمستشفى بتاعت الكشف اللى حتاخد منك التحاليل
انا حكتب لحضراتكم معظم المستشفيات اللى بيبعتوا عليها و دى بالحظ
______________________________________________________
اسماء بعض المستشفيات اللى بتحول عليها جامكا
مستشفى الصفاالعنوان : 40 ش العراق متفرع من ش شهاب - المهندسين -الجيزة
التليفون : 02/33361010
مركز ستار ميديكال
العنوان : 11 ش عبدالله الكاتب - الدقى -الجيزة
التليفون : 02/37604164 , 02/37604165
مستشفى الامل
العنوان : 25 ش فوزى رماح متفرع من ش السودان - المهندسين -الجيزة
التليفون : 02/33479214 , 02/334792124, 2/33043061 , 02/33057647 , 02/33057492 , 02/33450538 , 16271
مستشفى الجزيرة
العنوان : 8 ش احمد لطفى السيد -فيصل -الجيزة
التليفون : 02/39765824 , 02/39765823 , 02/37805522 , 02/35866062 , 01068406400
مستشفى النصر
العنوان : 6 ش ابن هانى الأندلسى متفرع من ش الطيران خلف مسجد رابعة العدوية - مدينة نصر - القاهرة
التليفون : 02/22603815 , 02/22603816
مستشفى السلام الدولى
العنوان : كورنيش النيل المعادى بجوار الفا سكان - المعادى -القاهرة
التليفون : 02/25240250 , 19885
مستشفى الشروق
العنوان : 3, 5 ش بحر الغزال متفرع من ش احمد عرابى - الصحفيين - المهندسين -الجيزة
التليفون : 02/33044901 , 02/33458690
الفا سكان
العنوان : 73 ش الميرغنى - الدور الاول - أعلى صيدليات سيف - د.فاتن عبدالرحمن - مصرالجديدة - القاهرة
التليفون : 02/24175556 , 16171
مستشفى العلاج
العنوان : 13 احمد الصاوى متفرع من ش مكرم عبيد - مدينة نصر - القاهرة
التليفون : 02/26717894 , 02/26717896 , 02/22744941
مستشفى النيل بدراوى
العنوان : كورنيش النيل - المعادى - القاهرة
التليفون : 02/25240022 , 02/25240212 , 02/25240025 , 02/25242446 , 02/25240072
سابعاًً
بعد ما بتكشف و بياخدوا منك عينه دم فى المعامل المركزيه لوزاره الصحه مفروض بتاخد وصل عشان تستلم شهادتك الصحيه بالنسبه للسعوديه المكتب هوا اللى بيستلمهاتقدر تستفسر على النتيجه من خلال الموقع الالكترونى للوزاره الصحه
اضغط هنا
بتدخل الباسبور بتاعك من غير الرمز الاول و الصفر اللى بعده
و بيديلك النتيجه و قت ظهورها
___________________________________________________
انا حاليا عند الخطوه دى ادعولى اخلص الباقى عشان اكتبلكم
ثامناََ
بعد ظهور نتيجه تحليل من وزاره الصحه مكتب التحاليل المركزيهوكمان بعد ظهور نتيجه التحاليل اللى اعملت فى مستشفى تبع مركز جمكا و اللى المستشفيات دى بدورها متعاقده مع دول الخليج للكشف على المواطنين اللى راغبين فى السفر
كده انت دورك خلص و جيه دور المكتب اللى حابب اوضح بعض منه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
المكتب مفروض انه بيستلم نتيجه كشوفاتك الطبيه
بيدخل بكل الكشوفات الصحيه دى و معاه الشهاده الصحيه اللى بتثبت خلوك من كل الامراض المعديه للقنصليه اللى انت مسافر عليها
مفروض انه بيجيبلك التاشيره على الباسبور بتاعك وانا كانوا كمان مشتريين تاشيره دخول ب 500 ريال و تمن الفيزا نفسها 50 ريال برده
مفروض كمان عشان الاقامه اللى مفروض حتاخدها لما توصل عندهم انه بيوثق الشهاده بتاعت التخرج بتاعتك من القنصليه كتاكيد على صحه الاختام اللى موثقها وزاره الخارجيه المصريه بمعنى تانى انه ملوش دعوه ايه اللى مكتوب جوا الشهاده هوا بيثبت صحه الاختام اللى وزاره الخارجيه المصريه حطاها على شهاده التخرج بتاعتك
كده مبروك عليك التاشيره
و جيه دور تدفع المبلغ اللى اتفقت انت و المكتب عليه ..... ربنا يعوض عليك فى المبلغ اللى حدفعه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
المكتب عمل معايا حركه واطيه خالص
خلانى اروح اوثق فى الشهر العقارى توكيل مفاده انه ملوش اى دعوه بيا هناك فى السعوديه لا من بعيد ولا من قريب و انه مش مسؤل عن اللى حيحصل فى السعوديه معايا وانه متبرى منى تماما ولاكانه يعرفنى
وهنا اخوك عمله مجبر لا بطل
مكانه فى الجيزه فى مكتب ضواحى الجيزه فوق كشرى الامير
و بصراحه لولا كشرى الامير كنت قعدت الف سنتين هناك
هوا عباره عن شقه صغيره خالص فى الدور التانى و بيحتاج منك العقد ده اللى المكتب بيكتبهلولك و انت زى التاكس بتروح توثقه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لغايه كده انت مفروض خلصت شغلك فى القاهره و ترجع بلدك عشان تجهز تصريح العمل و شنطتك و تذكره سفرك
_____________________________________________________
اشوفكم قريب بعد ما اخلص تصريح العمل
تاسعاَ تصريح العمل اللى بيطلب منك فى المطار
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــبصراحه انا مش شايف ليه اى لزمه فلوس بتاخدها الدوله عشان تستنفع منك قبل ما تسافر بره بس اهو بنعمل اللى علينا عشان انت عارف بتوع المطار ناس رخمه و بتصدق ما تلاقى حاجه عليك
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
المطلوب من معاليك عشان حوار التصريح ده
- 3 صور شخصيه حديثه
- لكل سنه بتدفع 130 جنيه للمؤهلات العليا عن كل سنه بتسافرها
-صوره من التاشيره و صوره من اول صفحه فى الجواز بتاع السفر بتاعك
-صوره بطاقه
- طلب اسمه طلب لاول مره حتلاقيه فى المكتب ده لو مكتب محترم او حتلاقيه من اى مكتبه تصوير جنب مكتب تصاريح العمل
- كده انت بتديله كل ده و هوا بيفتحلك ملف عنده عشان كل مره حتسافر حتجدد فيها السنين اللى قعدتها بره مصر و زى ما قلت كل سنه عليها 130 جنيه
- كده انت خلاص خلصت الطلبات
- بتستلم تصريح العمل بعد 3 ايام بالباسبور بتاعك
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
***** تقدر تكتب على نفسك تعهد فى المطار و تعمله لما تنزل اول مره و من غيره المره التانيه يعنى تطلع تصريح العمل مش حتسافر يعنى الاولى سماح لكن بعد كده لا و سمعت و ياريت تتاكد من الكلام ده ان فى مكتب للعمل جوا المطار بس بياخد مصاريف اغلى من المكتب اللى فى بلدك
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
دى من موقع وزاره الداخليه :-
الحصول عـلى إذن للعمل بهيئة أجنبية خارج البلاد ( تعاقد شخصى )
القواعد الحاكمة لإجراءات الحصول على الخدمة
وفقا لقرار رئيس مجلس الوزراء رقم 4248 لسنة 1998 فى شأن تيسير الحصول على خدمة الحصول على أذن بالعمل لأول مرة للمصرين لدى هيئات أجنبية خارج البلاد .
تلتزم الجهات الإدارية بالنموذج الصادر من وزير الدولة للتنمية الإدارية بالتعاون مع وزارة الداخلية بتحديد المستندات والأوراق المطلوبة والرسوم اللازمة لإجراءات طلب الحصول على هذه الخدمة والتوقيتات الزمنية التى تعلن فيها جهة الإدارة قرارها . ولا يجوز للجهات الإدارية طلب مستندات أخرى أو تحصيل رسوم أو تقاضى مبالغ تحت أى مسمى من المسميات غير الوارد النص عليها فى هذا النموذج مع الالتزام بإعلان رأى الإدارة الى طالب الخدمة فى التوقيت المحدد لها ويلغى كل نص أو حكم يخالف مايلى :
أولا : المستندات والأوراق المطلوبة :
عقد العمل الموثق للاطلاع عليه وإرفاق صورة منه .عدد ( 2 ) صورة شخصية مقاس 4×6 سم .
جواز السفر للاطلاع عليه للتأكد من حصوله على تأشيرة الدولة التى سيعمل بها .
ثانيا : الرسوم والمبالغ اللازمة لأداء الخدمة
100 جنية لحملة المؤهلات العليا .
60 جنية لغير حملة المؤهلات العليا .
10 جنيهات ثمن الوثيقة .
ثالثا : التوقيت الزمنى :
تعلن جهة الإدارة قرارها فى طلب هذه الخدمة للمواطنين فى مدة لا تتجاوز 24 ساعة .
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
اماكن تصاريح العمل فى جمهوريه مصر العربيه منتشره فى كل محافظه و عشان تعرف مكانها فين عندك انا حنزل لينك وده من بنك مصر عشان الدفع بيكون فى فرع من البنك جنب المكتب على طول يعنى تقدر من خلال عنوان مقر فرع البنك تعرف مكتب تصريح العمل فين فى محافظتك.
ًعاشراالخطوه دي مهمه جداً
حجز الطيران وللاسف الشديد نتيجه جهل مكاتب التوظيف طبعاً هما قفشوا الفلوس و مش مهم حضرتك.
لازم تعرف حضرتك المكان اللي الناس بتوع شغلك حيستنوك فيه..... الغلطه بتمن تذكره واسال مجرب
توكلنا علي الله وحجزنا دلوقتي لازم تعرف الوزن اللي مسموح بيه و برده الغلطه بحساب يعني انت تلاقي حجز رخيص و تفرح بيه تلاقي قدامه مفيش وزن يعني هما مش عبط و انت اللي ناصح
حاول تشغل خطك تجوال عشان اول ما تعدي خطوط مصر تلفيونك ده بقي بدون حراره
مفروض كمان انك تتصل علي رقم المندوب اللي حيكون في استقبال حضرتك في المطار
المشكله في الدخول للمطار السعودي الزحمه غير العاديه و الناس اللي فوق بعضها وكمان رخامه اللي علي مكتب الجوازات بالاضافه في الانتظار في الطابور
خلي بالك طويل خالص وتلاجة
ياريت تسافر بلبس كويس متهندم كرافته لو امكن او بدله عشان دي الصوره بتاعت الاقامه و اللي حتستمر طول فتره اقامتك في المملكة مبرووووووك انت كده في المملكه
الحادي عشر دلوقتي جيه دور الاقامه
بمجرد ما بتوصل و تستلم شغل اول حاجه تسال عليها هيا الاقامه
الاجراءات و تمن الاقامه علي الشغل اوعي حد يطلب منك فلوس انت مش بتدفع هلله في الاجراءات دي
البدايه بتكون في تحليل دم و كشف صدر اشاعه
بعدها بتاخد خطاب من الشركه و بتروح تسجله في الغرفه التجاريه في البلد اللي انت نازل عليها
بالنسبه للمهندسين
لازم يتاكدوا انك مسجل في بلدك و ان شهادتك مش مضروبه
الاول بتروح الهيئه السعوديه للمهندسين عشان تعرف حتدفع كام
اللي بعد ٢٠١١ بيدفع ١٢٥٠ ريال
ما قبل ٢٠١١ بيدفع ١٧٥٠ ريال
دي انت بتدفعها من جيبك يعني ربنا يعوض عليك فيها
الخطوات انك بترفع كل اصول شهاداتك علي الموقع بتاعهم و صوره شخصيه خلفيه بيضا بمقاس معين بتظبطها فتوشوب عشان المقاس
بيتم الدفع علي مرتين الاولي ٥٠٠ ريال و المره التانيه ٧٥٠ ريال
كده انت بتسلم جوازك للشركه و بعدها هما بيخاطبوا الجوازات
بعدها بتستني الاقامه تطلع
بعد الاقامه حتبدا في خطوات الرخصه
ودي حفتح لها موضوع لوحدها
